كونفەرەنتسياعا اۋماقتىعى بەس رەسپۋبليكانىڭ ىشكى ىستەر مينيسترلىگىنىڭ تىكەلەي ەسىرتكىنى باقىلاۋعا العان دەپارتامەنتتەرىنىڭ, دەنساۋلىق ساقتاۋ مينيسترلىگىنىڭ ناركولوگيالىق-ەمدەۋ ورتالىقتارى مەن مەملەكەتتىك ەمەس ۇيىمداردىڭ وكىلدەرى, سونداي-اق بىرقاتار شەتەلدىك مارتەبەلى مامان-مەيماندار قاتىسۋدا.
ەكى كۇنگە سوزىلاتىن كەڭەستىڭ العاشقى ساعاتتارىندا قازاقستاندا جاڭادان پايدا بولعان سينتەتيكالىق ەسىرتكىنى پايدالانۋ مەن ونى ەمدەۋ ۇلگىلەرى, ناركولوگيالىق ەسەپكە تىركەۋدىڭ حالىقارالىق يننوۆاتسيالىق تالاپتارى مەن شەشىمدى جولدارى, ناشاقور-ناۋقاستىڭ ەمدەلۋگە قولجەتىمدىلىگى سەكىلدى ماسەلەلەر تالقىعا سالىندى. وسى ورايدا نەگىزگى بايانداما جاساعان چەح رەسپۋبليكاسىنىن كەلگەن ەسىرتكى جونىندەگى ۇيلەستىرۋشى-مامان يندريح ۆوبوريل مەن CADAP باعدارلاماسىنىڭ جەتەكشىسى ەرنەست روبەللونىڭ, ۇلتتىق باعدارلاما ستراتەگياسىنىڭ بەلسەندىسى دجون-پيتەر كۋلستىڭ (نيدەرلاندى) سوزدەرى تارتىمدى شىقتى. وندا قوعامدىق دەرتپەن كۇرەسۋدىڭ سان قىرلى جولدارى مەن ادىستەمە-تاسىلدەرى اشىپ كورسەتىلدى. پروفيلاكتيكالىق-ينوۆاتسيالىق قوزعالىستارعا بارشا ازاماتتاردى جاپپاي تارتۋ ماسەلەلەرى ايتىلدى.
ءوز كەزەگىندە ءسوز العان قازاقستان رەسپۋبليكاسى ىشكى ىستەر مينيسترلىگىنىڭ ەسىرتكى بيزنەسىمەن كۇرەس جانە ەسىرتكى اينالىمىنا باقىلاۋ جاساۋ جونىندەگى دەپارتامەنتىنىڭ جاۋاپتى وكىلى يۆان دوبرىشين ەسىرتكىگە قارسى جۇرگىزىلەتىن نەگىزگى شارالار مەن مونيتورينگ جاساۋدىڭ ەۋروپالىق تاسىلدەرى قازاقستان اۋماعىندا تالاپتاعىداي جۇزەگە اسىپ جاتقانىن اتاپ ءوتتى.
ء–بىزدىڭ ماماندارىمىز امستەردامداعى Trimbos ينستيتۋتىندا بولىپ, نيدەرلاندىق ارىپتەستەردىڭ ۇلتتىق مونيتوريگ جاساۋ ورتالىعىنىڭ قىزمەتىمەن تانىستى, كەڭىنەن زەرتتەدى, – دەدى دوبرىشين. – سونىڭ يگىلىكتى ناتيجەسى بولار تاياۋ مەرزىمدە ءدال سونداي مونيتورينگىلەۋ ورتالىعى ءبىزدىڭ ەلىمىزدە دە اشىلادى.
ورتالىق ازيا ەلدەرىندە ەسىرتكىنىڭ تاراتۋعا توسقاۋىل قويۋ جونىندەگى باعدارلامانىڭ ەۋرووداقتىڭ وسى سالاداعى سالالىق جوباسىنا تىكەلەي قاتىسى بار. نيدەرلاندى, چەح رەسپۋبليكاسى, پولشا مەن گەرمانيا مەملەكەتتەرى سەكىلدى حالىقارالىق ىنتىماقتاستىق اياسىنداعى باعدارلاماعا ەو قارجىلاي قولداۋ كورسەتىپ كەلەدى.
جيىنعا قاتىسۋشىلار تۇستەن كەيىنگى ماجىلىسىندە دەنساۋلىق ساقتاۋ مەن ەسىرتكى قاۋىپسىزدىگى تاقىرىبىندا كەڭەيتىلگەن وتىرىس جاسايدى. ەلىمىزدە پايدا بولعان جاڭا سينتەتيكالىق ەسىرتكىنى پايدالانۋدىڭ اسا كۇردەلىلىگى مەن قازىرگى تاعداعى ساندىق ءوسىمى, ونى جاعاشا ەمدەۋ ۇلگىلەرى تۋرالى قازاقستان دارىگەرلەرى ويلارىن ورتاعا سالادى.
تالعات ءسۇيىنباي,
«ەگەمەن قازاقستان»
الماتى
